البيض البلدي والفرق بينه وبين البيض (الأبيض والأحمر) الموجود في الأسواق 🤔

🤔
قبل ما أقولكم الفرق بين النوعين لازم تفهموا قصة التغذية للدواجن بتحصل إزاي ؟!!
وقبل ما أقول أي كلمة حط الكلمة دي في دماغك
( الفرخة لو كلت أي أكل أيا كان نوعه ، اللحم والبيض بيتأثر به جداا ، يعني هتلاقي آثاره و ريحته في اللحم والبيض لا محالة )
نبدأ بقى دلوقتي :
الفرخة أيا كان نوعها عشان تبيض بتبدأ من بعد عمر ١٨ أسبوع إلى ٨٠ أسبوع ، ودي أعلى فترات إنتاج البيض للفرخة
بتحتاج بروتين بيتراوح خلال الفترة دي من ١٨-١٦٪
بتحصل عليهم إزاي الفرخة بقى ؟
عن طريق الأعلاف ( أعلاف البياض )
بتتكون من أيه بقى الأعلاف دي ؟
أي علف في الدنيا بيتكون من 3 حاجات رئيسية :
⁦⬇️⁩ذرة كمصدر للطاقة
⁦⬇️⁩وفول صويا كمصدر للبروتين
⁦⬇️⁩وحاجة اسمها مركزات ( ودي اللي بتمد العلف بباقي العناصر والبروتين الكافي لإنتاج البيض ) ودي ١٠٪ من العلف
⁦🖌️⁩⁦🖌️⁩ بالنسبة للذرة والفول صويا دول مستخلصات نباتية زي الفل مفيش عليهم غبار
أمال أيه المركزات دي بقى ؟!!
دي حضرتك في منها نوعين ، وركز معايا أوي :
💡النوع الأول من قديم الأزل وما زال ناس لحد دلوقتي بتستعمله اسمه المركزات الحيوانية
ودا عبارة حضرتك عن أيه بقى ؟!!!
مستخلص من مسحوق الريش على العظم على شوية بلاوي زرقاء كدا بتديك بروتين يفوق ٥٠٪
أيوا هو زي ما حضرتك فهمت كدا
بياخدوا ريش الفراخ يولعوا فيه لحد ما يوصل لمرحلة الانصهار ويتحول لبودر وبعد كدا ياخدوه ويأكلوه للفراخ تاني في هيئة مركزات
لو حد بقى ساكن قريب من مجزر بيعمل تدوير لمخلفات الدواجن ، هيشم ريحة معفنة كدا على فترات اسوأ بمراحل من ريحة مصنع الجلوكوز اللي في مسطرد
هي دي بقى ريحة المخلفات وهي بيعاد تدويرها عشان تدينا مركزات حيوانية
-- خد بالك بقى ، هي دي سبب الزفارة بتاعة البيض ، ولو حضرتك مركز معايا من الأول لما قلتلك الفرخة لو كلت أي حاجة بتتأثر بيها ، فطبيعي لما تآكل علف فيه مركزات حيوانية أن البيض يطلع زفر ، ويبان أكتر بقى كل ما البيضة تتخزن أكتر ومتبقاش فريش
-- بأكد لحضرتك تاني أن النوع دا من المركزات ما زال بيستعمل وموجود منه بيض في الهايبر ماركت الكبيرة زي سعودي ومترو وأولاد رجب و.......
نكمل ع النوع التاني بقى
💡 النوع التاني اسمه مركزات نباتية :
أيوا بقى في حاجة نضيفة في البلد دي أهي 😍😍
دا بقى عبارة عن مستخلص نباتي مع نسبة بسيطة جداااا برضو من المركزات الحيوانية
ودي اللي بتطلعلنا بيض اسمه semi-organic
يعني بيض أورجانيك حتى اشعار آخر
ودا بيض للأمانة نضيف جداااا وموجود منه برضو في الهايبر ماركت الكبيرة زي كارفور و......
ونسبة كبيرة جدا من المزارع بتستعمله حاليا
ودا هنلاقيه أغلى شوية ومُغلف في plastic package
ودا مش هتلاقي فيه أي زفارة خالص ، وبنسبة كبيرة جدا صحي وزي الفل
..
علماء التغذية بقى حديثا حبوا يعملوا حاجة مفيهاش أي نسبة مركزات حيوانية خالص وتطلعلنا بيض
Full organic
يعني مفيهوش خالص حاجة تخص الحيوان
فبدأوا باستخلاص مادة اسمها الجلوتين من الذرة ودي بروتينها ٦٠٪ عشان تحل محل المركزات ، وبالفعل عملوا كدا
وبقى علف الدواجن كله نباتي
يعني هتديك بيض ابن ناس مفيهوش غلطة
بس نسبة قليلة جدا من المزارع اللي بتعمل كدا
ليه بس ، ليه مش المزارع كلها تشتغل بالنباتي دا ؟!
أقول لحضرتك 🤔🤔
عشان التكلفة
بدل ما طبق البيض هيتكلف في إنتاجه من بروتين حيواني مثلا ٢٦ جنيه
هيتكلف من مركزات نباتية مثلا ٢٨ جنيه
هيتكلف من جلوتين مثلا ٣٢ جنيه
وطبعا المربي بيدور على اللي يكسبه أكتر
فطبيعي اللي بينتج ألف طبق بيض يوميا هيفرقوا معاه ألفين جنيه يوميا فرق بس للأعلاف
يبقى نخلينا في اللي يكسبنا أكتر
ويولع المستهلك ، لأن المربي تحت ضغط السوق اللي البيض فيه سعره مش ثابت والعلف سعره بيزيد من يمة ومن يمة تانية مفيش عليه إشراف بيطري
عاوز أقولكم أن برغم الفرق اللي حضرتك شايفه في الإنتاج البسيط دا
الفرق دا بيتحول لعشرين وتلاتين جنيه فرق في سعر طبق البيض في الهايبر ماركت
وشركات تلعب على وتر أن البيض أورجانيك وبيض يقلل الكوليستيرول
وغلاوتك عندي أغلبهم نصابين يعني أنت هتحلل طبق البيض وتحاسب الشركة يعني
وبرضو المستهلك هو المضحوك عليه
طبعا محدش فاهم الحلقة بين المربي والمستهلك غير الطبيب البيطري
لكن الدولة شايفه أن الطبيب البيطري لو شيلناه خالص
أهو المربي بينتج والمستهلك بيآكل وخلاص
..
نرجع لموضوعنا
أيه بقى الفرق بين البيض البلدي والبيض ( الأبيض والأحمر) بتاع المزارع
لو الفراخ البلدي بتاكل علف في مزرعة
وغلاوتكم عندي ما هيفرق بيض بلدي من هندي
اللي بيفرق العلف فقط لا غير
يعني لو الفرخة البيضاء أكلت علف نباتي والفرخة البلدي أكلت علف حيواني
والله العظيم البيض الأبيض هيبقى أنضف ألف مرة من البيض البلدي
والعكس صحيح
..
ليه بقى زمان كان البيض البلدي نضيف ؟!
عشان مكنش فيه لا مركزات ولا زفت
كانت الست الريفية البسيطة بتربي فرختين بلدي وتأكلهم برسيم على بواقي أكل بيت على شوية عيش وذرة
كله نباتي في نباتي
يديك بيضة صحية زي الفل
..
لكن حضرتك كمستهلك ومع زيادة الطلب على البيض البلدي
بقت المزارع تربي بلدي وتأكله أعلاف وتديك بيضة عادية جداااا
وحضرتك فرحان أنك بتآكل بيض بلدي
يا رب أكون قدرت أفهمكم حاجة
..
المرة الجاية هكلمكم عن إزاي تعرف صلاحية البيض
وطرق التجار في غش البيض

..منقول